Kwentong Bato, Taxi at Obese sa Isang Araw

Ilang Linggo na rin ang nakakalipas mula ng malaman ko sa Annual Physical Exam naming na may malaking bato sa gall bladder ko. Linggo lingo suki ako sa clinic para mag follow up ng final results ng ultra sound. Araw araw din para akong napapraning. Sumakit lang ang tagiliran ko pakiramdam ko yung gallstone ang dahilan. Bago pa kasi ako na ultra sound isang lingo na akong sinisikmura, isang lingo ko na rin akong ngumangalot ng Kremil-S at umiinom ng H2Bloc. Sabi ng Doktor isa din daw yun sa sintomas ng may mga gallstones. Kahit anong antacid ang inumin walang epekto.

Finally, dumating na rin ang results ng physical exam. Lahat pala ng result ay iinterpret ng doctor para sa empleyado. Bago na ang mga doctor sa clinic wala na si Ina Magenta at si Ate Luds na kaboses ni Helen Vela. Sila yung madalas na magpalitang doctor sa clinic. Lalaki ang naka schedule na doctor, mukhang Chinese at payat reminds me of Uncle sa Jacky Chan cartoons.

Gusto ko na talagang malaman kung confirmed yung gallstone ko kasi binabasa pa ni Uncle yung results at nang bumukas ang bibig,"hmmm Jane sabi dito sa APE report mo, OBESE ka, "sabay ngiti ng pigil.

Di ito ang tamang panahon para mag taray kaya nasabi ko na lang, “ hehe wag nyo na pong ilakas nakakahiya.” Ngumiti lang si Uncle. Atat na talaga ako, gusto ko na talagang ma confirm ang results para mawala na yung kaba ko at maka-advance na sa next step ika nga.

“May mild urinary tract infection ka kailangan mong magpa urinalysis ulit. May bato ka rin daw.” Finally, ang hinihintay ko. “Medyo malaki siya ha,” sabay kuha ng ruler para imuwestra ang 1.4 cm na bato. “Ganito na siya kalaki.” Haay pambihira alam ko naman kung gaano kalaki ang 1.4 cm. “Ang position niya ay malapit sa neck ng gall bladder mo going sa bile duct.” Kinabahan ako kasi ang alam ko pag malapit dun delikado. “Kailangan mong matingnan ng surgeon para ma verify kung ano ang dapat gawin pero normally pag ganyan kalaki at malapit sa neck tinatanggal.”

Handa ako sa mga narinig ko pero itong huling linya ng doctor hindi ko talaga napaghandaan. “Normal lang uric acid mo pati blood sugar. Aba mababa ang cholesterol mo below the normal range. Ang MATATABA hindi naman bawal kumain ng MATABA.” Grrrrrrrrrr asus ayos na sana ang parting comments dinagdagan pa.

Magalang pa rin ako, “okay po thank you Doc.” Umalis na ako agad baka may lumabas pa ulit sa bibig ni Uncle at may iba ng lumabas rin sa bibig ko… gaya ng apoy.

Nung araw na ring yun nagpunta ako sa pinaka main clinic ng kumpanya ditto sa Makati. Nandun kasi yung mga specialist gaya ng surgeon. May endorsement letter ako para matingnan.

Umuulan ulan nun kaya nag-taxi ako. I only have P100 in my pocket tama na siguro balikan. Sakto may taxi na dumaan sa likod ng office. Di naman traffic kaya nakarating agad ako. Pagbayad ko sa taxi wala daw siyang barya. Eh wala talaga akong dala kundi ang 100 pesos. “Patay libre pa ata,” side comment ng taxi driver. Automatic nagpanting agad ang tenga ko, “Hoy mama hindi ako nagpapalibre, kasalanan nyo kung wala kayong panukli hindi naman barya pasahe sa taxi.” Kaasar talaga kung mga 70 pesos ang patak ng metro talagang ibabatok ko sa kanya yung 100 keep the change kaso 37.50 lang aba pare pareho lang naman kaming nagtatrabaho.

Buti na lang nandun ang surgeon at ako na agad ang next in line. Nabawas bawasan ang inis ko sa driver. Tinawag na ako ng doktor. Nakita yung APE report ko at endorsement galling kay Uncle.

Pinaliwanag sa akin ng doktor yung position ng gallstone ko. Delikado pala kung bumara yun sa neck na tinatawag kasi pwede talagang mag rapture yung gall bladder mo. Maninilaw ka na lang pala bigla pag nag rapture ang gall bladder at shempre may pain. Akala ko dun na nagtatapos ang lahat at eendorse nalang ako sa Makati Med, “Kasi yang bato sa apdo common talaga yan sa mga 4Fs. Female, FAT, Forties at Fertile.” Sabay ngiti,”bata ka pa pero mataba ka kasi.”

Pambihira humirit pa may bato na nga. Oo na oo na OBESE, MATABA may BATO. Pero shempre ngumiti lang ako yung hindi labas ang ngipin kasi nag uunahan na naman ang mga apoy sa bibig ko nagbabadyang lumabas.

Ayos ang araw na ito nahiritan ako ng mga doktor ng walang kalaban laban mula kay Uncle hanggang kay Doc Surgeon.