Mahaba haba ang bakasyon nung nakaraang Linggo. Kung meron mang iginanda sa kasalukuyang administrasyon yun ay ang paglilipat ng holidays sa araw na may pasok. Sa halip na mapahinga sa bahay sa ospital kami nauwi kasama ang bunso kong anak. Ang hirap talaga pag bata ang may sakit... siguradong ngangat ngatin ng awa ang puso mo kung makita mong nakahiga at may dextrose.
Sa isang maliit na ospital lang nadala ang anak ko kung saan nagki clinic ang kanyang pediatrician. Dahil nga dun ang clinic ng pedia (sa Malolos dahil may clinic din siya sa manila sa Delos Santos) kampante ako at nanduon ang doktor ng anak ko. Gusto sana niyang dalhin sa maynila ang bata at duon i admit kaya kinabahan ako, pero dahil kailangan na ng hydration ng anak ko napilitan siyang duon i-admit ang bata. Baka daw madehaydrate ng tuluyan ang bata kung ibabayahe pa sa M. Si doc ang nagkabit ng dextrose ng anak ko IV sa linguwahe nila. Di makita ang ugat sa kamay kaya sa paa nilagay. Nung nakaalis na si doc at pumanik na kami sa silid na magiging pansamantalang tahanan namining mag-ina, natanggal ang dextrose ng bata. Parang eksena sa programang Nginig... umaagos ang dugo sa binti ko na galing pala sa paa ng anak ko. Akala mo ba ako ang nataranta asus yung nurse (tawagin na lang natin siyang Nurse Ah) ang napasigaw... Wala na raw si doc sino ang magkakabit ng dextrose. Medyo naguluhan ako kasi 2 beses na akong nanganganak at puro nurse ang nagsaksak ng dextrose sa akin sa ibang ospital sa Malolos din. Buti na lang may cellphone natawagan namin si doc na hindi pa nakakalayo. Sa makatuwid naikabit sa kabilang paa ang dextrose. Awang awa ako sa bata namaos na kaiiyak. Tusukin ka ba naman for the 2nd time around.
Paglabas ko ng room naglilitanya si Nurse Ah day off day siya ngayon at napasubo daw siya pagmamagandang loob pumasok sa hospital. Matay ko mang isipin saan kaya siya napasubo? Nagtu turn over ng doctors order sa isa pang nurse (tawagin na lang nating Nurse Bah). Sa unang tingnin pa lang medyo mas malala ang hitsura niya kay Nurse Ah. Una, di hamak na malaki siya sa malaki ko ng pangangatawan sa makatuwid maaring mabiogat ang kamay ng nurse na ito. Pangalawa, shower ang bangs niya naalala ko tuloy nung nasa kolehiyo pa ako na halos lahat kaming magkakaklase ay may bangs na kailangan halos masundot ang mata mo sa haba. Wala lang malimit ko kasing makitang nurse ay nakahawi ang buhok kung hindi man naka hair net. Pangatlo medyo basa ang uniporme nya kahit may aircon sa ospital.... ang hygiene.
Wala dalawang oras ang nakakalipas kalong ko ang bata habang panay ang haplos sa katawan napansin kong matigas at maga ang binti niya kung saang paa nakasaksak ang dextrose. Ayoko munang tawagan si Nurse Bah kaya tinext ko muna si Doc kung normal bang mamaga ang pinagsasaksakan ng dextrose. Ang reply niya tatawagan daw niya yung resident doctor. Dahil hindi naman ako tiga row 4 nung bata, alam kong di normal yun. Wala kong choice kundi ang tawagin si Nurse Bah medyo matagal na rin kasi at wala pang pumapasok sa silid namin para tingnan ang bata.
"Nurse maga yung binti ng anak ko, pakitingnan naman."
Eto reply ni Nurse Bah, "ah kaya pala nag text si doc valenzuela" sabay sunod sa akin.
Kasabay ng matinding iling... tinganggal niya ang dextrose at sinabing tatawagin niya ang doctor on duty. Si Nurse Bah di rin pala marunong maglagay ng IV. Sabagay kahit marunong siya sa pakiramdam ko mamamaga lalo ang paa ng anak ko sa hawak pa lang niya. Nang ikakabit na ang dextrose at makita ng doktor ang dalang abbocath (isa sa natutunan ko sa hospital eto yung parang karayom na sinasaksak para pagdaluyan ng dextrose), hindi yan yung pang bata. At may sinabi siyang terminology na silang 2 lang ang nakakaintindi.
"Wala pong ganun doc eto po ang pang bata." Aba si Nurse Bah tinutuos ang doktor. Eh nabuksan na niya lalagyan.
"Hindi yan yung @#@% nga... yun ang pang pedia," giit ng doktor.
Nasabi ko na pabibili na lang kung wala nung size na sinasabi ng doktor sa halip na yung dala ni Nurse Bah ang ilagay na marahil eh kinamamaga ng paa ng bata. Lumabas ang doktor at pagbalik may dalang bagong abbocath, dilaw ang lalagyan at mas maliit sa unang binuksan ni Nurse Bah. Sa wakas naikabit na ulit ang dextrose at unti unti ng humina ang iyak ng anak ko na kanina pa nagpapalahaw.
Paglabas ng doktor si Nurse Bah, inadjust ang daloy ng dextrose... medyo binilisan. Patingin tingin sa relos at parang binibilang ang patak ng dextrose. Matuk lumabas na. awang awa na ako sa bata namawis kaiiyak. Haay pasasaan ba at lalabas din kami mapalitan lang ang nawalang tubig sa katawan ng anak ko.
Madaling araw na ng muli kong kinailangan ang serbisyo ng nurse. Ang dextrose na marathon sa bilis ang patak naubos. Di ko alam kung kailan nauubos dahil naidilip kaming mag asawa pagbabantay. Lumabas ulit ako ng kwarto na katapat lang ng nurse station. Muntik na akong mapatalon sa eksenang nakita ko. Nurse Bah pa rin ang nurse on duty at may makipot pero mahabang upuan kung saan siya nakahiga. Pambihira... pwede palang matulog ang nurse on duty at nakabalandra pa sa daan. Buti kung maliit siya.
"Nurse...nurse..." di natitinag si Nurse Bah.
Sa medyo mas malakas na boses,"Nurse ubos na ang dextrose." Wala pa ring Nurse Bah na tumatayo. Gusto ko ng dungulin ang upuang kinahihigaan tiyak, laglag si Nurse Bah pero nanaig ang makaTAO kong puso.
Sa talagang malakas ng boses,"Nurse pakipalitan yung dextrose ng bata naubos na."
Di ko man dinunggol ang upuan halos malaglag ang naalimpungatan na si Nurse Bah. May panis pa atang laway at medyo nagulong shower bangs... dumiretso sa kwarto namin. Para bang nagsisinungaling ako at gusto ko lang siyang gisingin sa sarap ng pagkakahimlay niya. Bumalik sa nurse station at kumuha ng panibangong dextrose. Nang mapalitan, inadjust ulit ang bilis ng daloy. Tumingin ulit sa relo niya na hindi naman digital at bumubulong bulong habang tinitingnan ang patak ng dextrose. Matuk at lumabas na. Tiningnan ko medyo mabagal ang patak ngayon sobrang bagal na makakailang malik mata ka bago pumatak ulit. Sa pakiwari ko dapat nakalagay sa doctors order kung gaano kabilis ang patak ng swero. Naisip ko na sa takot ni Nurse Bah na gisingin ko ulit siya kung sakaling mauubos ang dextrose kaya binagalan na ang patak.
Kinaumagahan di man lang nag 1/4 ang bawas ng dextrose. Ng tingnan ko, di na nga pala pumapatak at ayun hinihigop na ng plastic tube ang dugo sa paa ng bata. Lumabas ulit ako at ibang nurse na ang naka duty. Tawagin na lang nating siya Nurse Kah. Di hamak na maliit siya kay Nurse Bah... at lulumain ang high lights ni Lani Misalucha sa buhok niya. Medyo mukha din siyang si Elvira sa sobrang dark ng lipstick niya. Pambihirang Ospital to kakaiba ang mga nurse.
Walang tingin tingin sa relo (dahil wala siyang relo) at wala ring bulong bulong ... tiningnan lang niya ang patak ng swero at inadjust ito. Dag dag ni Nurse Kah nasa pwesto raw ng paa kaya di minsan pumapatak ang swero. Si Nurse Kah na rin ang nag palit ng ikatlong dextrose ng anak ko. Kinabukasan pa pala kami makakauwi haaay.
Sa pangatlong araw namin si Nurse Ah na ulit ang nurse on duty. Tinanong ko siya kung pwede naming makuha ang partial bill. Pwede daw sa ibaba sa billing. Bumalik ako sa kwarto at pinakiusapan ang asawa ko na siya na ang bumaba. Pagbalik niya wala pa raw tao sa billing dahil maaga pa masyado. Sinabi din niya na 4 days daw ang babayaran namin sa room. Di nga ako ganun kagaling sa math pero mahusay akong bumilang. Naitanong ko kung bakit 4 na araw. Tinanong daw niya si Nurse Ah at every 12 midnight daw ang cut off nila. Hmmm Linggo ng hapon kami pumasok... isang araw. Buong Lunes... pangalawang araw. Martes kasalukuyan kung 12 midnight man ang cut off di na ako makikipagtalo malabas kami ng hapon.. panagatlong araw lang.
Ako ang bumaba isang oras ang makalipas. Wala pa ring tao sa billing pero nasalubong ko si Nurse Ah at may kasamang isa pang nurse na tawagin na lang nating Nurse Dah.
"Nurse ilang araw na ba ang charge sa amin dito sa Ospital," tanong ko.
"Four days po." Nakangiti pa si Nurse Ah ng sumagot.
"Panong naging 4 eh 3 araw pa lang kami nag stay dito?"
"12 midnight po ang cut off," paliwanag ni Nurse Ah. Sumangayon din si Nurse Dah.
"Tingnan mo ha... Sunday pumasok kami hapon na yun pero sige bilangin nating isang araw yun. Then Monday, second day at ngayon 1pm daw kami lalabas sabi ng doktor. So bale 2 1/2 days lang pero sige kung pano man yang cut off niyo gawin na nating 3 days."
"Kaya nga po cut off memyang 12 midnight kaya 4 days na po."
Medyo nag iinit ang ulo ko sa simpleng math. " OO nga cut off nyo ng 12 midnight pero wala pang 12 midnight alas otso y medya pa lang ng umaga at lalabas kami ng ala una ng tanghali... at pangatlong araw pa lang namin ngayon Linggo...Lunes..Martes," sabay muwestra ng daliri baka sakaling mas maintindihan.
Makikipagtalo pa sana si Nurse Ah pero sabay tawa, "ay oo nga akala ko Miyerkules nan gayon."
HELLOOOOOOO. Natawa na lang ako kunyari pero sa loob loob ko B-O-B-O. Ilang beses na akong nag litanya ng Linggo, Lunes at Martes ngayon, tapos sasabihin mo akala mo Miyerkules.
Bago kami nakalabas na sana ala una ng hapon... pero halos als tres na ng makalabas kami, muntik na naman akong maging "Customer from Hell". Dahil ike-claim ko sa insurance ang gastos.. humingi ako ng charge slips para makita ang detalye ng charges sa statement.
5 abbocath --- 600.00
3 wee wee bag --- 210.00
4 D5 0.3 (medicine) --- 400.00
miscellaneous --- 500.00
Limang abbocath eh 2 beses lang natanggal ang dextrose ng bata. Isang beses lang kinuhaan ng wee wee at 3 dextrose lang ang naubos. Kailangan ko ng eksplanasyon, kahit pa insurance ang magbabayad. eto ang paliwanag ng nasa billing.. "yan po ang naka record ma'am. Yan ang bigay ng nurse. Dyan lang kami nagbabase ng charges."
Shempre nagtransform na ako, nandun si Nurse Dah, "paki check nyo naman ang records paanong nangyari yan kahit tanungin mo pa ang doktor, 3 dextrsoe lang ang nauubos, 3 beses din lang pinalitan ang abbocath at 1 beses lang nakunan ng wee wee ang bata."
Tatawagan pa daw yung mga nurse on duty yung isa daw papasok na. Papayag ba akong mag antay pa sa dami ng pinagdaanan namin sa Ospital na ito.
Sa kontroladong boses ito ang litanya ko "napakagulo nyo lalo na ang mga nurse nyo. Simpleng recording na lang nagkakamali na. Paglalagay ng dextrose kung walang doktor di kaya? Hindi na kami mauulit dito."
Lumabas ako para mahimasmasan. Ilang sandali lang bumalik si Nurse Dah at inabot ang billing namin paki check daw. Nabago lahat ng inireklamo ko. Bago lumabas dumaan kami sa Pedia ng anak ko at nagpaalam. Nagpaumanhin si Doc sa clinic na lang daw niya sa Delos Santos kami magkita sa mga susunod na araw. Nakuha ko na ang ibig niyang sabihin.
Malaki ang respeto ko sa mga Nurse ilang beses na ring may na-Ospital sa pamilya ko at madalas na sa kanila pinagkakatiwala ang pasyente habang wala ang doktor. Gusto ko tuloy alamin kung mga registered nurse ba sila Nurse Ah, Bah, Kah at Dah. Baka sa ilalim lang ng basket ball court nag board exam ang mga lekat na nurse.
